Girtiyekî li zindana Misilmiyê ya navendî ya li bajarê Helebê îdia kir ku, di encama pevçûnên di navbera hêzên rejîmê û Artêşa Azad de 6 kes û ji ber nexweşiyan jî 8 kes bi giştî 14 girtiyan jiyana xwe ji dest daye.

Girtiyê ku nexwest navê xwe aşkera bike, diyar kir ku di encama pevçûnên di navbera hêzên rejîmê û Artêşa Azad de rokêtek li beşên yekemîn û duyemîn ên zindanê ketine û 6 girtiyan jiyana xwe jidest daye, her wiha ji ber nexweşiyan jî di çend rojên borî de 8 kesan jiyana xwe jidest daye.

Heman girtî got ku, ev 5 rojin li zindanê xwarin û vexwarin pir kêm bûye, hêzên rejîmê jî girtiyên ku doza av û xwarinê dikin tehdît dikin. Heman çavkanî diyar kir ku, li girtîgehê gelek nexweşî belav bûne û girtî ji ber tunebûna dermanan bi mirinê re rû bi rû ne.