Li hemberî Serokwezîrê Lîbyayê Abdûllah es Sînî sûîqestek hat kirin. Hat ragihandin ku di êrîşê de tiştek bi Serokwezîr nehatiye.

Hatem El Ûraybî li ser navê hikûmeta li Tobrûkê daxuyaniyek da û anî ziman ku sûîqesta li hemberî Serokwezîr Abdûllah es Sînî bi ser neketiye. Ûraybî da xuyakirin ku di dema derbasbûna wesayîta Serokwezîr de gule hatiye reşandin û yek ji parêzvanan birîndar bûye.

Berdevkê hikûmetê diyar kir ku di êrîşê de tiştek bi Serokwezîr nehatiye û destnîşan kir ku ev êrîş ji bo kuştina Serokwezîr hatiye kirin.

Li Meclîsa Nûneran a li Tobrûkê, duh êvarê pêşniyarnameyek der heqê hikûmeta Abdûllah es Sînî dihat nirxandin. Di vê rûniştinê de ti biryar nehat stendin û nirxandin hat taloqkirin.

Li Lîbyayê ku piştî kuştina Mûammer Kaddafî ji sala 2011'an û vir ve pevçûn lê her dewam e, li Trablûs û Tobrûkê du hikûmet û parlamentên ji hev cuda hene. Civata navneteweyî jî Abdûllah es Sînî weke Serokwezîrê Lîbyayê nas dike.