Dêra Protestan bang kir, ku li dijî çeteyên DAIŞ'ê hîn bêhtir alîkariya çekan ji Başûrê Kurdistanê re were dayîn.

Serokê Konseya Dêra Protestan a Elmanya (EKD) Heinrich Bedford-Strohm diyar kir ku divê ji bo têkoşîna li dijî barbariya DAIŞ'ê çek ji Başûrê Kurdistanê re were dayîn. Bedford-Strohm ji Spiegel Online re axivî û destnîşan kir ku ji bo parastina ji komkujî û mirinan, ji bilî alîkariya çekan ti rêyeke çareseriyê nîne.

Bedford-Strohm da xuyakirin ku li hemberî êrîşên li dijî Xiristiyanên li Başûrê Kurdistanê û Iraqê, pêşmerge "yekane hêza parastinê" ya têdikoşe ye û xwest, hîn bêhtir alîkariya çekan ji pêşmergeyan re bê dayîn. Bedford-Strohm da zanîn ku ji bo parastina Xiristiyanan û hemû hindikahiyan ji çeteyên DAIŞ'ê, divê Neteweyên Yekbûyî (NY) bi berpirsyarî rabe û anî ziman ku di rewşeke berevajî de girîng e ji pêşmergeyan re çek were dayîn.

Serokê Konseya EKD bang li Misilmanan jî kir û got, "Girîng e Misilman der heqê kevneşopî û pirsgirêka şîdetê de nêzîkatiyeke rexnedayînê nîşan bidin."

Bedford-Strohm bang li bajar û komunên Elman jî kir ku selefiyên meyla xwe ji şîdetê re heye tespît bikin û ji bo van mirovan qezenç bike, xebatan bimeşînin.

Hikûmeta Elmanyayê, piştî komkujiya DAIŞ'ê li Şengalê kir, bi armanca biçekkirina pêşmergeyan alîkariya çekan a ji 70 mîlyonî dabû Başûrê Kurdistanê. Lê belê beşeke biçûk a vê alîkariyê ji çekên giran pêk dihat.