Rêxistina Efûyê ya Navneteweyî, derbarê metirsiya darvekirina hejmarek girtiyên siyasî yên Rojhilatê Kurdistanê û Îranê daxuyaniyek belav kir û hişyarî da.

Di daxuyaniyê de hat gotin; "Em bang li rayedarên Îranê dikin ku cezayê darvekirinê yê li ser girtiyên siyasî yên ku niha di Girtîgeha Şêban a Ahvazê de tên ragirtin û rûbirûyî metirsiya herî mezin a bidarvekirinê ne, demildest rawestînin."

Rêxistinê bi taybetî li ser rewşa girtiyên siyasî yên bi navên Mesûd Cameî, Elîreza Mûrdasî, Ferşad Îtîmadî Fer, Reza Ebdûlî û Hesen Mûslawî hişyarî da û xwest ku her planek ji bo bicihanîna cezayên wan bi lezgînî were sekinandin.

Rêxistina Efûyê ya Navneteweyî nêzîkatiya dadwerî ya rejîma Îranê ya li hemberî muxalîfan rexne kir û diyar kir ku pêvajoya darizandina van kesan tije pirsgirêkên hiqûqî û binpêkirina mafên mirovan e.

Rêxistinê ragihand şert û mercên Girtîgeha Şêban gelekî xirab in, girtîgeh pir qelebalix e û xizmetguzariyên pêwîst lê nînin. Rêxistinê da zanîn ku girtî ji dermankirinê bê par in û jiyana wan di metirsiyê de ye.

Rêxistina Efûyê ya Navneteweyî eşkere kir ku hikûmeta Îranê ji destpêka şerê xwe yê li gel Emerîka û Îsraîlê ve, herî kêm 42 girtiyên siyasî darve kirine.

Rêxistinê diyar kir ku rejîma Îranê cezayê darvekirinê weke amûrekê ji bo tirsandin, bêdengkirina dengên nerazî û zilmê bi kar tîne.