Li bajarê Qamişlo bi sedan malbatên dîlgirtiyan bi daxwaza berdana zarokên wan ji Çerxerêya Şehîd Rûbar heya Çerxerêya Osman Sebrî meşiyan. Malbatan  wêneyên zarokên xwe yên dîlgirtî hildan û pankartên "Em azadiyê ji lehengên xwe yên dîlgirtî yên parastina me kirine re dixwazin" û "Em ê heta dawiyê bi dîlgirtiyên xwe re bin" vekirin. 

Her wiha bê navber dirûşmên "Em dîlgirtiyên xwe dixwazin" û "Zindanan bişkînin, dîlgirtiyan derxînin" hatin berzkirin. Girseyê bal kişand ser rewşa xizmên xwe yên di girtîgehan de tên girtin û bang li saziyên navneteweyî û aliyên peywendîdar kir.

Malbatên ku beşdarî çalakiyê bûn daxwaza agahdariya zelal li ser rewşa dîlgirtiyan û berdana wan kirin.

Malbatan diyar kirin ku heta ku daxwazên wan bi cih werin ew ê çalakiyên xwe bidomînin.