Kongreya Neteweyî ya Kurd wê hefteya bê li Rojava were lidar xistin
Hate ragihandin ku Kongreya Neteweyî ya Kurd ku hêz, partî û rêxistinên Kurd ên herêma Bakur û Rojhilatê Sûriyeyê demeke amadekariya wê dikin, wê hefteya bê were lidar xistin.
Partî, hêz û rêxistinên siyasî yên herêma Bakur û Rojhilatê Sûriyeyê amadekariyê kongreya neteweyî ya Kurd dikin. Kongrê wê hefteya bê were lidar xistin.
Çav li rê bû ku encamên dan û standinan û reşnivîsa yekitiya partî, hêz û rêxistinên Kurd di Newrozê de hatibana eşkerekirin, lê komîteya amadekar ji ber hin astengiyan eşkerekirina encamên dan û standinan taloq kiribû.
Li ser daxwaza gel; hêz, partî û rêxistinên siyasî yên Kurd ên li Bakur û Rojhilatê Sûriyeyê li ser belgeya yekitiyê li hev kir.
Li gorî berpirsan, belgeya ku partî û hêzan li serê li hev kiriye, tekeziyê li ser avakirina komîteyeke ji bo gotûbêjkirina mafên gelê Kurd bi desthilata Şamê re, bidestxistina mafên Kurdan û tevlîkirina wan di destûra nû ya Sûriyeyê de dike.
16’ê Adara îsal partiyên Kurd di civînekê de lidarxistina kongreya neteweyî ya Kurd li Rojava, astengiyên li pêşiya yekrêziyê û lêkolînkirina belgeya siyasî ya ji encamên civînên berê yên di navbera aliyan de nîqaş kiribûn.
