Li Qamişlo, Çilaxa, Rimêlan, Girkêlegê û Dêrikê ji bo bîranîna şehîdên meha Gulanê, gaziyên Bakur û Rojhilatê Sûriyeyê rêzecivîn lidar xistin.

Civîn ji bo şehîdan bi deqeyek rêzgirtinê destpê kirin. Piştî rêzgirtinê destpêkê tehlîl û nirxandinên Rêber Apo hatin xwendin.

Piştre li ser navê gaziyan Ebû Cûdî Çilaxa li ser wate û girîngiya meha şehîdan nirxandin kir.

Ebû Cûdî diyar kir ku destketiyên îro gelên herêmê bi dest xistine bi saya şehîdan pêk hatine û got, “Em bi saya şehîdên xwe îro dikarin bi azadî xwe îfade bikin. Hevalên me bi ruhekî fedayî li hember her cure êrîş û hovîtiyan li ber xwe dan. Rêber Apo Tevgera Azadiyê ji bo bîranîna şehîdê me yê nemir Hakî Karer ava kir.”

Ebû Cûdî bal kişand ser rola gaziyan a di nav şoreşê de û wiha domand, “Rêbertiya me pir qîmet dide şehîdan. Weke gazî divê em di her şert û mercî de karibin pêşengiyê ji gelên herêmê re bikin. Îro li vir bi sedan hevalên me yên Kurd û Ereb ên ji bo parastina rûmet û kerameta xwe berdêl dane, ji bedena xwe parçe winda kirine hene. Heya dawiyê divê em xwedî li nirx û destketiyên xwe derkevin.”

Gaziyên mafê axaftinê wergirtin, dilsoziya xwe ya bi şehîdan û Rêber Apo re anîn ziman. Gaziyan destnîşan kirin ku ew ê heya dawiyê di şopa şehîdan de bimeşin.

Civîn bi dirûşmên, “Şehîd Namirin” û “Bijî Serok Apo” bi dawî bûn.