Ji bo mexdûrên erdhejê yên berê xwe dan Mêrsînê, welatiyan di 21’ê Sibatê de li taxa Kazanli ya navçeya Akdenîz a Mêrsînê 14 kon vedan. Lê belê demek piştre polîs hatin cihê konan û bi hinceta “ji bo vegirtina konan destûr nehatiye dayîn, ev der herêma karesatê nîne û divê ji walîtî yan jî qeymeqamtiyê destûr were girtin”, di 23’ê Sibatê de kon rakirin. Li ser vê yekê jî mexdûrên erdhejê li malên çandê yên taxên Çay û Çîlekê hatin bicihkirin.

Ji şêniyên Taxa Kazanliyê Serdar Cengîz bertek nîşan da û wiha got: “Me ev 14 kon bi saya piştevaniyê berhev kirin û vedan. Di her konî de 2-3 malbat diman. Lê belê bi hinceta destûr tuneye rakirin. Em dikin û nakin tu wateyê nadin vî tiştî. Divê pirsgirêka cihê mayînê yê mexdûrên erdhejê tavilê bê çareserkirin.”

Parlamenterê HDP’ê yê Mêrsînê Ridvan Tûran jî rakirina konan rexne kir û ev tişt anî ziman: “Bi vê kirinê re dewletê careke din zîhniyeta xwe ya qedexeker nîşan da. Dewlet, li mexdûran konan belav nake û divê dev ji vê zîhniyeta xwe ya qedexeker berde.”