Nobeta Edaletê ya malbatên girtiyên nexweş û girtiyên berdana wan hatiye taloqkirin ku li Baroya Îzmîrê dabûn destpêkirin, di roja 51’emîn de berdewam dike. Nobeta îro li Komeleya Piştevanî û Alîkariya bi Malbatên ku Xizmên Xwe Winda Kirine ya Anadolûyê (ANYAKAY-DER) didome. Rêveberên Partiya Demokratîk a Gelan (HDP) serdana malbatan kirin.

Hevseroka Rêxistna HDP’ê ya Navçeya Alîaga ya Îzmîrê Gul Ekîncî di serdanê de axivî û diyar kir ku li girtîgehan tecrîda girankirî berdewam dike. Ekîncî bal kişande ser vê yekê ku girtîgeh veguherîne makîneyên mirinê û got, “Bi hişmendiya AKP-MHP’ê înfaza girtiyên 30 salî tê betalkirin. Êşkence, mirinên bi guman û gelek binpêkirinên mafan hene. Em jî li rex dayikên ku li dijî vana li berxwe didin û li cem zarokên xwe ne cihê xwe digirin."

Piştre Endamê PM’ê yê HDP’ê Tevfîk Kaçar axivî û destnîşan kir ku ew li ba malbatên girtiyan cih digirin û xwest girtiyên nexweş demildest werin berdan.