Çalakiya greva birçîbûnê ya li pêşiya Ofîsa Netewên Yekbûyî ya li Cenevreyê ku pêşengtiya wê parlamenterên HDP’ê û hevşaredar dikirin, di roja 19’an de didome. Çalakî dibin pêşengtiya Tevgera Jinên Kurd a Ewropayê (TJK-E) de didome. Bi sedan Kurdistanî û dostên wan serdana çalakiya kon ya ku ji aliyê 40 jinên welatên cûda yên Ewropa ve hatibû vedan, dikin.

Bi dirûşme û vekirina pankartan dagirkeriya dewleta Tirk û çeteyên wê ya li Efrînê tê şermezar kirin. Di heman demê de jinan erka hêzên navnetewî û NY bibirdixin û daxwaz dikin ku li dijî dewleta Tirk bikevin nava tevgerê.

WEKÎLA KATALAN: TÊKOŞÎNA KURDAN JI BO ME BÛ REFERANS

Parlamentera Katalan Anna Gabrîel û nûnerên Partiya Karker a Swîsreyê (POP) serdana çalakgeran kirin. Gabrîel peyam piştevaniya bi Efrînê re da.

Gabrîel li vir axivî û bibîrxist ku ji ber biryara girtinê ya Îspanyayê neçar ma welatê xwe terk bike û wiha domand; “Ji bo piştgirîdayîna gelê Kurd îro ez li virim. Têkoşîna gelê Kurd ji bo gelê Katalan bu referansek girîng. Eger Kurdistan bi ser bikeve, Katalan jî wê serbikevin.”

ÇALAKGER: EM DAGIRKERIYÊ QEBÛL NAKIN

Li aliyê din ji çalakgerên greva birçîbûnê Şenge Kahraman, Medîne Zaray û Hulya Yalçin têkildarî çalakiyê ji ANF’ê re axivîn.

Şenge Kahraman wiha got; “Dewleta Tirk êrîşî destkeftiyên gelê Kurd dike û hêzên navnetewî jî carek din hevkariyê bi dewleta Tirk re dikin. Îro wek jin em li pêşiya NY ne û çalakiay xwe didomînin, ji ber ku em carek din destûr nadin duyemîn planên tinekirinê û em ê hevkartiya wan têk bibin.”

Kahraman bang li NY û hêzên navnetewî kir ku li dijî bûyerên li Efrînê bêdeng nemînin û wiha got; “Divê ti kes li dijî bûyerên li Efrînê bêdeng nebe û nebe hevkarê dagirkeriyê. Em ê ji bo Efrînê li berxwe bidin û li her derî çalakiyan lidar bixin. Heta ku ev hêz bêdeng bin em ê li deriyên wan bin û çalakiyên xwe bidomînin. Heta ku Efrîn û Kurdistan azad nebe em ê li berxwe bidin.”

Medîne Zaray jî got wê dayik tu caran dagirkeriya Efrînê qebûl nekin û wiha got; “Li Efrînê zarok, jin, dayik tên qetilkirin. Xakên me dagir dikin û malên me talan dikin. Em li dijî vê bêdeng namînin. Ew xak yê me nîn. Em ne tenê ji bo xwe ji bo hemû gelan aşitî û demokrasiyê dixwazin. Îro li vir ji bo mirovahiyê em çalakiyan li dar dixin û erka xwe ya mirovahî em bicih tînin.”

Ji Yekîtiya Jinên Sosyalîst Hulya Yalçîn jî wiha axivî; “Duh gelê Kurd dema ku li dijî DAIŞ’ê şer dikirin Ewropa û cîhanê pîştgirî didan. Lê îro dixwazin Kurdan tine bikin, Ewropa û cîhan ji vê re bêdengin. Hêzên Emperyalîst di nava xwe de parvekirin dikin û ji bo berjewendiyên xwe piştgiriyê didin dagirkeriya dewleta Tirk. Îro bi vê çalakiya xwe em dixwazin dawî li vê hevkartiya wan bînin.”

Yalçin got dixwazin li Rojava şoreşa jinê bitepisînin û wiha domand; “Em wek jin em ê li berxwe bidin û xwedî li şoreşa jinê derbikevin. Heta ku Efrîn azad nebe em ê li her derî çalakiyên xwe bidomînin.”