Hevserokê PYD’ê Salih Muslim li Stockholmê çû serdana greva birçîbûnê ya ji aliyê Kurdan ve bi armanca piştgiriya ji bo grevên birçîbûnên yên bêdem û dorveneger ên di girtîgehên li Bakûrê Kurdistan û Tirkiyeyê, hatiye destpêkirin.

Muslim çûn hundirê konê ji bo greva birçîbûnê hatiye vedan û bi çalakgeran re sohbet kir. Muslim ji ber vê helwesta wan Kurdên li vir di grevê de pîroz kir û da zanîn ku gelê Kurd gelek zindî û têkoşer, gelê Kurd li her derê çiya, li deştê, di girtîgehan de, di her şert û mercan de li ber xwe didin. Her wiha, berxwedana gelê Kurd ya li hemû parçeyên Kurdistanê, Ewropa û zîndanan nirxand û da zanîn ku ev yek nîşan dide ka gelê Kurd çiqas xwedî rêxistin e û amade ye.

Muslîm got; “ Gelek gelên ku dewletên wan hene jî ne bi qasî Kurdan xwedî rêxistin in. Çawa ku gava derziyek li cihek ê laş dikeve, bandorê li her derê dike, bi heman awayî neheqî li kuderê li hemberî Kurdekî bê kirin, Kurd hemû dibin xwedî helwest.”

Muslim bal kişand ser têkoşîna berfireh a gelê Kurd û diyar kir ku têkoşîna gel a li Rojavayê Kurdistanê xurt dibe û berxwedana di zîndanan de parçeyên vê têkoşînê ne.

Salih Muslîm bang li dewleta Tirk kir ku daxwazên berxwedêrên di girtîgehan de pêk bîne û da zanîn ku çi dewleta ku gelê Kurd biqewirîne nikare bi ser bikeve. Muslîm da zanîn ku ew weke PYDê dixwazin tavilê tecrîda li ser Rêberê Gelê Kurd were rakirin û hevdîtinên aşitiyê bên destpêkirin.

Hate diyarkirin ku dê li roja 25’ê cotmehê roja pêçşemê, li Qada Sergel a Stockholmê ku Kurdistaniyan lê dest bi greva birçîbûnê kiriye, dê xwepêşandanek bê lidarxistin.