Serokê YNK’ê Bafil Talebanî ku bi Balyozê Rûsyayê yê li Iraqê re hevdîtin kir, geşedanên li herêmê nirxand û derbarê Rojava de wiha got, “Divê rêz li taybetmendiya Rojavayê Kurdistanê were girtin û mafên gelê me di çarçoveya destûrek nû de werin parastin.
Serokê Yekîtiya Nîştmanî ya Kurdistan (YNK) Bafil Talebanî îro li Silêmaniyê pêşwaziya Balyozê Rûsyayê yê li Iraqê Elbrus Kutraşev kir.
Di hevdîtinê de rewşa giştî ya Herêma Kurdistan û Iraqê hate nîqaşkirin. Her wiha tekezî li ser pêwîstiya berdewamiya diyaloga avaker di navbera aliyan de ji bo çareserkirina pirsgirêkan û parastina aramiya li Rojhilata Navîn kirin.
Derbarê hilbijartinan de, civînê tekezî li ser lidarxistina hilbijartinên zelal, dadperwer kir ku parastina mafên hemûyan garantî bike û bibe sedema vejîna bêhtir ya welat.
Ji aliyekî din ve, rewşa Sûriye û Rojavayê Kurdistanê hate nîqaşkirin û Bafil Talabanî tekezî li ser parastina mafên hemû netewe û civakan, bi taybetî yên Kurdan wekî neteweyek mezin kir. Talebanî di vê derbarê de got; “Divê rêz li taybetmendiya Rojavayê Kurdistanê were girtin û mafên gelê me di çarçoveya destûrek nû de werin parastin.”
