Ji bo gerîlayê HPG’ê Egîd Akgun (Sefqan Xerzan) ku di 20’ê Adara 2025’an de di êrîşeke li herêma Zapê de şehîd bûbû, li gundê Xizorkîn ê navçeya Tetwan a Bedîsê ku lê hatibû dinê û mezin bûbû, konê sersaxiyê hate danîn.
Li ber mala malbata Akgun konê sersaxiyê hate danîn û bi pêşengiya Komeleya Yekîtî, Çand, Piştevaniya bi Malbatên ku Xizmên Xwe li Dergûşa Şaristaniyan Winda Kirine re (MEBYADER) serdaneke berfireh pêk hat.
Nûnerên partiyên siyasî yên bajêr, rêxistinên civaka sivîl û gelek welatî beşdarî serdanê bûn. Di axaftinên ku li sersaxiyê hatin kirin de, bal hat kişandin ser têkoşîna Akgun ê ku jiyana xwe ji dest daye û hesreta aştiyê ya gel. Piştî axaftinan, sersaxî ji malbatê re hate xwestin û serdan piştî duayan bi dawî bû. Malbata Akgun wê sê rojan sersaxiyan qebûl bike.
