HDP’e bûyerên li Kurdistanê ji sazî û dezgehên navneteweyî re radigihîne. Polîtîkayên qirker ên dewleta Tirk li hember navçeyên xwerêveberiyê, HDP’ê bir Navenda Neteweyên Yekbûyî (NY). Cîgirên Hevserokên Giştî yên HDP’ê Nazmî Gur û Meral Daniş Beştaş, li Navenda NY a li Cenevreyê bi nûnerên Komîsertiya Bilind a Mafên Mirovan a NY re hevdîtin pêk anîn, bal kişandin ser polîtîkayên qirker ên dewleta Tirk ên li ser Kurdistanê.

QETLÎAM Û BINPÊKIRINA MAFÊN GIRAN JI RAYEDARÊN NY RE HATIN RAGIHANDIN

Di hevdîtinê de Gur û Daniş bal kişandin ku Tirkiye li Bakurê Kurdistanê hiqûqa şer a navneteweyî binpê dike, daxwaz kirin ku li gor Hiqûqa Şer a Cenevre bikevin nav tevgerê.

Beştaş û Gur ji ANF’ê re nirxandin kirin, têkîldarî naveroka hevdîtina bi rayedarên NY re agahî parve kirin.
Gur got, asta binpêkirina mafên mirovan a li Kurdistanê bi rayedarên NY re parve kirine.

“BÛYERAN JI NÊZ VE DIŞOPÎNIN”

“Rayedarên me hevdîtin bi wan re kirin gotin bûyerên li Kurdistanê ji nêz ve dişopînin û ji me re gotin ku serlêdanên têkîldarî mijarê pir girîng in. Rayedaran diyar kirin ku bi temamî bi dezgehên mafên mirovan re di nav têkîliyan de ne û bûyeran dişopînin.”

‘HIQÛQA CENEVREYÊ BINPÊ DIKIN’

Beştaş destnîşan kir ku li Kurdistanê hiqûqa şer tê binpêkirin, wiha domand: “Me bi awayekî yekser ji rayedaran re gotin ku îro li Kurdistanê, Hiqûqa Şer a Cenevre ku Tirkiye jî endamê wê ye tê binpêkirin.”