Bi sedan kes, bi pêşengiya DBP û HDP'ê ji ber AZC Plaza civiyan û ji bo şikandina dorpêşî û sekinandina komkujiya tê kirin, ber bi navçeya Sûrê ya 8 roj in derketina derve lê qedexe ye, meşiyan. Parlamenterên HDP'ê Feleknas Ûca û Sîbel Yîgîtalp jî di nav de girseya gel rastî astengiya hêzên dewleta Tirk hat. Tevî dorpêçiya tîmên taybet a bi maşînên zirxî, girseya gel dest bi meşê kir. Lê belê polîsan bi ava şid û gaza îsotê êrîş kirin û careke din dor li girseyê girtin.

Yîgîtalp ji polîsan re got, "Em ji bo sekinandina mirinan dimeşin, ev meş berpirsyariyeke demokratîk û wijdanî ye, ti qanûn ji jiyana mirovan hêjatir nîne." Polîsan jî jê re got, "Ji bo me qanûn di ser her tiştî re ye."

'HÛN ÇI DIKIN BIKIN, EM Ê XWEDÎ LI BERXWEDANÊ DERKEVIN'

Piştî destwerdanê, li ber AZC Plaza Yîgîtalp ji girseya gel re axivî û got, "Nêzî 4 meh in şerekî antî-demokratîk tê meşandin. Ji ber vî şerî bi sedan kes birîndar bûn, bi dehan mirovan jiyana xwe ji dest dan. Hemam, mizgeft û minareyên dîrokî zerar dîtin. Bi tenê sedemeke van êrîşan heye; daxwaza gel a rêvebirina xwe bi xwe ye. Li hemberî van hemû êrîşan em dibêjin; hûn çi dikin bikin ev gel wê xwedî li zarokên xwe, xwedî li berxwedana xwe derkeve."

Girseya gel piştî daxuyaniyê û çalakiya rûniştinê belav bû.