Parlementerê HDP’ê yê Dêrsimê Alîcan Onlu têkildarî êrîşên hêzên dewleta Tirk ên li hember şehîdgehan û navendên bawerî û îbadetê, pêşnûmepirsek da Serokwezîr Ahmet Davûtoglû.

Onlu got, "Şehîdgeha Dr. Baran û Sûna Çîçek, ku hestiyên pêşiyên me yên di Qirkirina Dêrsimê de hatin qetilkirin hene û Mala Cem, di 17'ê Cotmeha 2015'an de hatine bomekirin."

'KÊ FERMANA ÊRÎŞAN DAYE?'

Onlu ji Davûtoglû xwest bersiva van pirsan bide:

"Kê fermana bombekirina goristanê, Mala Cem û Mizgeftan daye?

Di qada navneteweyî de êrîşên li hemberî goristan, navendên bawerî û îbadetê dikeve çarçoveya sucê mirovahiyê. Têkildarî kesên ku ferman dane de lêpirsîn hatiye destpêkirin?

Bombardûmana li hember goristan û cihên îbadetê yên pîroz ên gelê Dêrsimê, ji bo tê çi wateyê?

Di êrîşên DAIŞ'ê yên li hemberî cihên pîroz û van êrîşên li Dêrsimê de, çi cudahî heye?

Têkildarî bombardûmana li hember goristan û cihên îbadetê nêrîna Serokê Karê Diyanetê çi ye?

Daxuyaniyên Serokwezîr ên têkildarî bombekirina meqamên pîroz û êrîşên li ser goristana de çi ye? 

Berpirsariya Hikûmetê çiye?

Bi van êrîşan re peyameke çawa ji gelê Kurd re tê dayîn?"