Li Şirnexê berxwedana xwerêveberiyê ya li dijî êrîşên qirkirinê di roja 56’an de didome. Taxên Yenî û Bahçelîevler bi tankan tevahiya şevê hatin bombekirin. Li taxên tên bombekirin, bi taybetî li taxên Îsmetpaşa û Cûmhûriyetê şer giran e.

Ji wesayîtên zirxî jî bênavber bi çekên giran gule li taxên berxwedanê tên reşandin. Li taxa Bahçelîevlerê saet di 05.00 de çeteyên Qesrê ketin hundirê avahiyekê. Û li vê avahiyê teqîneke dijwar rû da.

Li gorî agahiyên ji herêmê hatin bidestxistin, avahiya ku çeteyên Qesrê xwestin weke biryargehê bi kar bînin, ji aliyê hêzên YPS/YPS-JIN’ê ve hat teqandin û gelek kuştî û birîndarên çeteyên Qesrê hene. 

Piştî teqînê gelek ambûlansan berê xwe dan cihê bûyerê û kuştî û birîndarên çeteyên qesrê rakirin.

Çeteyên Qesrê yên ku piştî teqîna avahiyê vekişiyan, piştre bi obûsan tax bombe kirin û ji ber vê bomberdûmanê şewat bi gelek xaniyan ket. Şerê li taxê yê di navbear hêzên YPS/YPS-JIN’ê û çeteyên Qesrê hînê bi dijwarî dewam dike.

Taxên Yenî, Cûmhûriyet û Îsmetpaşa yên bajêr tên bombekirin. Bi taybetî taxa Yenî ev du roj in bênavber bi obusan tê bombekirin. Şerê li vê derê jî didome.

Li ser Şirnexê liv û tevgera balafirên bêmirov û helîkopteran jî dewam dike.