Li Mersînê polîsên Tirk bi guleyên rast êrîş bir girseya ku piştgiriya xwerêveberiyên li Kurdistanê dikir, ciwanê bi navê Sedat Baran qetil kirin û 3 kes jî birîndar bûn.

Li navçeyên Şevket Sumer, Gundogdû û Yenîpazar a girêdayî Akdeniz a Mersînê bi sedan welatî ji bo piştgirîdayîna xwerêveberiyên li Kurdistanê çalakiyek li dar xistin. Polîsên Tirk êrîşî girseyê kir û ciwanê bi navê Sedat Baran qetil kirin. Ciwanaên li pêşiya avahiya Dibistana Seretayî a Kibrisê kom bûn rastî êrîşa polîsan a bi guleyên rast hatin, di êrîşê de Baran jiyana xwe ji dest da, hat diyarkirin ku 3 kes jî birîndar bûne.

Polîsan dibistan xistine dorpêçê, bi gelek wesayîtên zirxî yên TOMA û Akrep derdora dibistanê girtine û nahêlin kes nêzîkî dibistanê bibin. Li ser vê jî gel li derdora dibistanê kom bû, polîsan bi guleyên rastî êrîşî gel kirin û gel jî li hember êrîşan ketin xweparastinê.

Li taxan êrîşa polîsan û berxwedana gel hê didome.

Li aliyê din cenzeyê Baran rakirin morga Nexweşxaneya Dewletê ya Mersînê, hat diyarkirin ku her 3 ciwanên birîndar jî li heman nexweşxaneyê tên dermankirin. Hat diyarkirin ku beşdariya parêzerê malbatê ya ji bo otopsiya cenazeyê Baran ji aliyê dozger ve hat astengkirin.