Ji bo oxirkirina cenazeyên şervanên Lîwaa Cebhet El-Ekrad Elî Şêr (Usama Hemo) û Mezlûm (Ocalan Welo) ku li herêma Şehbayê dema li dijî komên çete û artêşa dagirker a Tirk şer dikirin jiyana xwe ji dest dabûn , bi sedan welatiyên kantona Efrînê li pêşiya Nexweşxaneya Avrîn a li bajarê Efrînê hatin cem hev.

Girseya gel piştî ku her cenazeyê her du têkoşeran wergirt, bi karwanekî girseyî berê xwe da Goristana Şehîd Refîq a li gundê Metîna ya navçeya Şera ya Efrînê.

Dema ku karwan gihişte goristanê, şervanên Yekîneyên Parastina Gel û Yekîneyên Parastina Jin merasîmeke leşkerî li dar xistin.

Paşê Serokê Desteya Malbatên Şehîdan Xelîl Hisên û endama Meclîsa Zagonsaz Fadîla Mihemed axivîn. Di axaftinan de hate destnîşankirin ku gelê herêma Şehbayê ji bo rizgarkirina herêmê ji dagirkeriya dewleta Tirk û komên çete yên girêdayê wê, cangoriyan dide û her wiha girîngiya şopandina rêça şehîdên azadiyê hat ziman.

Piştre nasnameyên her du şervanan hatin xwendin.

Cenazeyên têkoşeran bi dirûşme û tilîliyan hatin veşartin.