Di pêşengtiya Meclisa Gel, li Qada Seyîd Riza ya li Dêrsimê ji bo Tahîr Elçî aktivîteyek hat lidarxistin. Bi şîara “ Xwedî li mîrateya Tahîr Elçî derkeve” balonên hêviyê hatin firandin, nûnerên siyasî û rêxistinên civaka sivîl jî axivîn.

BÛL: TI CAR DEST JÊ BERNADIN

Hevşaredarê Dêrsimê Mehmet Alî Bûl wiha got, “ Her kesê ku aştîxwaz di vî welatî de, rewşenbîrên ji bo aştiyê hewl didin, nivîskar û helbestvan her tim dixwazin bêdeng bikin. Em vê ji Ahmed Kaya, Hrant Dînk dizanin, lê belê em dest ji yekîtî , aştî û berxwedana xwe ti carî bernadin.”
Bûl diyar kir, “ Serokê Baroya Dêrsimê ji ber fikrên xwe aniye ziman daxwaza girtinê tê kirin, Serokê Baroya Amedê jî hat qetilkirin.”

YILDIZ: BERXWEDANA WÎ BI SERKETINÊ TACÎDAR BIKÎN

Rêvebera Partiya Herêmên Demokratîk Gulseven Yildiz got: “Berxwedana me wê bidome. Sakîne, Fîdan û Leyla hatin qetilkirin, lê berxwedan bi dawî nebû. Îro jî Tahîr Elçî hat qetilkirin, hê ev berxwedan didome û wê bidome jî. Berxwedana ku me ji Tahîr Elçî wergirtî bi serketinê tacîdar bikin.” 

Di aktivteyê de, sînevîzyona ku jiyana Tahîr Elçî nîşan dida hat pêşandan.