Bi pêşengiya 'Însiyatîfa ji Ocalan re Azadî" li ber Parlamenta Ewropayê ya li bajarê Fransa Strasboûrgê çalakiya rûniştinê ya du rojan hat destpêkirin.

JI PARLAMENTA EWROPAYÊ TÊ XWESTIN AZADÎ Û TECRÎDA LI SER OCALAN BIXE ROJEVA XWE

Ji nûnerên HDP'ê yên Ewropayê Faîk Yagizan û ji 'Însiyatîfa ji Ocalan re Azadî' Fûat Kav, Hevserokên KCD-E Mûrat Ceylan û Diljah Osman, tevî girseyeke qelebalix cihê xwe di çalakiyê de girtin. Di çalakiya li bindê kon de, tecrîda li ser Rêberê Gelê Kurd Abdullah Ocalan hat şermezarkirin û hat xwestin ku Ocalan tavilê azad bibe.

Kurdistaniyan û dostên wan, çalakiyên xwe yên demeke dirêj e ji bo azadiya Ocalan li bajarên cuda yên Ewropayê lidar dixin careke din gihandin Parlamenta Ewropayê. Kurdistanî ji Parlamenta Ewropayê dixwazin tecrîda li ser Ocalan û azadiya Ocalan bixe rojeva xwe.

Çalakger bi tîşortên bi nivîsa "Ji Ocalan re Azadî" li qada çalakiyê kom bûn û bi yek dengî dirûşma "Azadî" qîriyan. Der barê çalakiyê de wê di saetên pêş de daxuyaniyek ji çapemeniyê re bê dayîn.

WÊ BI RAYEDARÊN PE Û CPT RE HEVDÎTIN BÊ KIRIN

Di nava du rojên çalakiyê de heyetek wê bi rayedarên Parlamenta Ewropa (PE) û Komîteya pêşîgirtina li îşkenceyê (CPT) re hin hevdîitinan bike û dosyayên ji bo azadiya Ocalan pêşkêş bike.

CIVÎNA BI BEŞDARIYA AYDAR

Wekî din îro danê êvarê saet di 18:00 de wê bi beşdariya Endamê Konseya Rêveber a KCK'ê Zubeyîr Aydar li ser bûyerên dawî yên li Kurdistanê civînek li qada çalakiyê were lidarxistin.