Li Silêmaniyê Înîsiyatifa Piştgiriya ji bo Rojavayê Kurdistanê civînek li dar xist û xebatên xwe yên komkirina alîkariyê nirxand. Înîsiyatîfê biryar da ku du lijneyên cûda bên avakirin û ji bo gelê Rojavayê Kurdistanê alîkariya xwarin û dermanan bê komkirin.

Înîsiyatîfa Piştgiriya Rojava baskê Silêmaniyê ku ji komek nûnerên rêxistinên sîvîl, rewşenbîr û siyasetmedaran pêk tê, vê êvarê li Silêmaniyê li Hola Mihemedê Mele Kerîm civînek li dar xist. Di civînê de xebat û çalakiyên înîsiyatîfê hatin nîqaşkirin. Înîsiyatîfê biryar girt ku li Silêmaniyê ji bo gelê Rojava pêngavek komkirina alîkariyê bê destpêkirin.Li gel komkirina pereyan alîkariya erzaq û xwarin her wiha ya dermanan bê komkirin. Dîsa hate destnîşankirin ku ji bo bi taybet pêwîstiyên zarokan û jinan jî xebatek xweser bê meşandin.

Di civînê de biryar hate dayîn ku du lijneyên cûda bên pêkanîn. Ev lijne weke lijneya pêwendiyan û lijneya komkirin û şandina alîkariyan hate destnîşankirin. Lijneya peywendiyan li gel bajar û navçeyên din û her wiha li gel Desteya Bilind a Rojavayê Kurdistanê di nava peywendiyan de be ku bikare alîkariya tê komkirin bi destekî berhev bibe û bigehe destê gelê Rojava. Her wiha lijneya duwem jî ji bo komkirina alîkariyê xebat bike.

Di çarçoveya vê civînê de wê li nav bazar û taxên Silêmaniyê konê nalîkariyê bên avakirin û alîkariya tê komkirin jî rojane veguhezînin Rojava.

Hêjayê gotinê ye ku Înîsiyatîfa Piştgiriya Rojava ev demeke ku dest bi xebatên xwe kiriye û li tevahî bajar û navçeyên Herêma Kurdistanê xebatan dimeşîne. Gelê Herêma Kurdistanê jî eleqeyek mezin nîşanî xebat û çalakiyên Înîsiyatîfê dide.