Li navçeya Mêrdîn Qoserê, di êavra 12'ê Çileyê de rêveberê DBP'ê yê Qoserê Cengîz Erdem û Selahattîn Aras û 2 jinên navên wan nehat hînbûn ji aliyê hêzên dewleta Tirk ve hatin înfazkirin. Hevserokên DBP û HDP'ê yên Qoserê Hakî Akansel û Lokman Yaşar dan xuyakirin, ku înfaz bi fermana hikûmetê tên kirin.

Akansel bibîr xist ku DBP bi bernameya xwe ya partiyê re xwedî mîsyona avakirina meclîsan û xwerêveberiyên li Kurdistanê ye û anî ziman ku dewlet ji bo vê mîsyonê ji holê rake û vîna xwerêveberiyê tine bike, partiya wan hedef digire.

Akansel da zanîn ku înfaz û komkujiyên di dema dawî de ji aliyê dewletê ve li hemberî endam û rêveberê partiya wan tên kirin 'biryara hikûmetê' ye û diyar kir, ku piştî înfazkirina endama Meclîsa Partiyê ya DBP'ê Sêvê Demîr, înfazkirina rêveberê wan ê navçeyê Cengîz Erdem bi zanebûn hatiye kirin.

Hakî Akansel got, "Divê ev yek ji aliyê her kesî ve were zanîn; em ê li hemberî van înfazan heta dawiyê li ber xwe bidin. Helwesta me wê mezinkirina berxwedanê be. Em ê li ser şopa şehîdên xwe heta dawiyê bimeşin."

Akansel xwerêveberî weke pêngava azadkirina Kurdistanê nirxand û destnîşan kir, ku berdêla xwe înfaz, zext û komkujî dibe bila bibe, ew ê ji vê armanca xwe venegerin.

'KONSEPTA NÛ YA ŞER A AKP'Ê'

Yaşar jî da zanîn ku înfaz û komkujiyên tên kirin parçeyek ji konsepta nû ya şer a hikûmeta AKP'ê ye û diyar kir, ku tercîha wan berxwedan û xwerêveberî ye, lewma nepêkane ku bi êrîş, komkujî û înfazan re ev daxwaza wan bê guhertin.

Yaşar ragihand ku wê hesabê van komkujî û înfazan werin pirsîn û got, "Li hemberî van komkujî, înfaz û wehşeta li cenazeyên me tên kirin, bersiva me wê mezintkirina berxwedana xwerêveberiyê be."

Yaşar bang li desthilatdarî û dewleta AKP'ê kir û got, "Bi vê rêyê hûn nikarin encamê werbigirin. Bi qetilkirin û înfazan re hûn nikarin bi me. Ev têkoşîn wê bidome û wê ji sedî sed bi ser bikeve."