Amadekariyên Konferansa Neteweyî ya Kurd ku sibê wê li Moskow bê lidarxistin, bi dawî bûn.

Konferansa Neteweyî ya Kurd ku her sal li paytexta Federasyona Rûsya, Moskowa tê lidarxistin, îsal wê bi navê “Li Hember DAIŞ’ê Perspektîfa Avakirina Koalîsyona Têkoşîna Navneteweyî” çêbibe.

Konferans ku organîzatortiya wê Yekîtiya Saziyên Civakên Kurd ên Navneteweyî û Enstîtuya Lêkolînên Stratejîk a Rûsya (RÎSÎ) dike, wê di saet 10.00’an de destpê bike. Ji Rojava, Hevseroka PYD’ê Asya Abdullah û Serokê Meclîsa Rêveberiya Kantona Kobanê Enwer Muslîm, ji Bakurê Kurdistanê Hevseroka KCD’ê Selma Irmak, Hevşaredarê Bajarê Mezin ê Amedê Firat Anli û Berpirsê Têkîliyên Derve yê HDP’ê Nazmî Gur, Endamê Kongreya Neteweya Kurdistan (KNK) Selahattîn Soro, Îşxan Ankosî û Cemal Şamoyan, Serokê Otonomiya Federal a Çand û Neteweya Kurdên Rûsya Ferhat Patiyev, Serokê Partiya Rusyaya Adil Sergey Mîronov û gelek siyasetmedar, diplomat, zanyarên Rojhilata Navîn, Kafkas û Asya wê tevlî vê konferansa li salona konferansê ya Enstîtuya Lêkolînên Stratejîk a Rûsya bibin.