Daxuyaniya Komîsyona Ziman, Çand û Perwerdeyê ya Kongreya Neteweyî ya Kurdistanê (KNK) bi vî rengî ye:

“Bi pêzanîn û destxweşiyeke zêde, Kongreya Neteweyî ya Kurdistanê - KNK kampanyaya ku li Bakurê Kurdistanê hatiye destpêkirin, pîroz dike û serkeftinek mezin jê re dixwaze. Di heman demê de em ê hêz û piştevan bin û çaverêyê serkeftinên mezin bin.

Zimanê Kurdî mal û hebûna nasnameya me ye. Ji bo me Kurdan ziman welatek e ku me hemûyan di bin sîwana xwe de tîne cem hev û dike yek. Ji ber vê yekê, pir girîng e ku em hemû bi serbilindî malên xwe bikin dibistanên zimanê Kurdî û elind û asoya zimanê nifşên paşerojê ronî bikin, pêgeh û hebûna neteweya xwe xurt û misoger bikin. Têkoşîn, xebat, plansazî, siyaseta ziman û çandî erkê neteweyî û exlaqî, yê her Kurdekî bi rûmet û resen e.

Em bang li hemû malbatên li Bakurê Kurdistanê dikin ku beşdarî vê kampanyayê bibin û malên xwe bikin dibistan û fêrgeha zimanê Kurdî. Divê hemû dezgehên medyayê jî bi tevahî beşdar bibin, piştgirî bidin.

Em bang li gelê Kurd û Kurdistaniyên li çar aliyên cîhanê û beşên din ên Kurdistanê dikin ku beşdarî vê kampanyayê bibin û hewlên berfireh bidin da ku zimanê me yê dayikê di qanûn û destûrên dewletên Tirkiye, Sûriye, Îran de bi hevşêweya destûra Iraqa federal bi fermî were naskirin. Divê mafê xwendin, nivîsandin, îfade û çalakiyên bi zimanê Kurdî di hemû civak û saziyan de ji bo Kurdan were garantîkirin û bidestxistin.”