Êrîşên çeteyan ên li hemberî Kantona Efrînê, li bajarê Amûdê hat protestokirin.

Serokê Desteya Karên Hundir a Kantona Cizîrê Kenan Bereket, li pêşiya avahiya Wezareta Karên Hundir a Amûdê daxuyaniyek da çapemeniyê û êrîşên li ser Efrînê protesto kir.

Bereket got: "Em amade ne bi hemû derfetên xwe alîkariyê bidin Kantona Efrînê." Bereket diyar kir ku êrîşên çeteyan ên li hember Kantona Efrînê pêk tînin hemû jî bi plan in û bibîr xist ku  van çeteyan beriya niha êrîşî Kantonên Cizîr û Kobanê jî kiribûn.

'TIRKIYEYÊ SÎNORÊN XWE VEKIR, ALÎKARÎ DA ÇETEYAN'

Bereket ragihand ku Tirkiye sînorên xwe li çeteyan vekirî dihêle û bang li dewleta Tirkiyeyê kir ku destê xwe ji nava Sûriye û Rojava vekişîne û ji bo avakirina Suriyeke demokratîk bibe alîkar.

Bereket got, "Êrîşên li hember Efrînê pêk tên, bi konsepta înkar û tinekirinê ya li dijî Rojava ve girêdayî ye" û êrîşên çeteyên DAIŞ, El Nusra û Ehrar Şam ên li hember Kantona Efrînê jî şermezar kir.

'HÊZÊN BERXWEDÊR WÊ BI SER BIKEVIN'

Bereket wiha axivî: "Êrîşên li hember Efrînê berdewamiya êrîşên li hember Kantona Cizîr û Kantona Kobanê ne. Ez bawer dikim wek êrîşên beriya niha jî ev çete wê têk biçin û hêzên berxwedêr wê bi ser kevin."