Li paytexta Fransa Parîsê, ji bo serbestberdana siyasetmedarên Kurd ên li Elmanyayê girtî ne, çalakî hat lidarxistin.

Bi pêşengiya Civaka Demokratîk a Kurd (CDK) li Fransayê, bi wesîleya 10'ê Kanûnê Roja Mafên Mirovan a Cîhanê, li ber Sefaretxaneya Bilind a Elmanyayê çalakiyek hat lidarxistin û daxwaza serbestberdana siyasetmedarên Kurd hat kirin.

Di çalakiyê de ku Hevserokên Navenda Civaka Demokratîk a Kurd (NCDK) lê amade bûn de, wêneyên siyasetmedarên Kurd ên li girtîgehên Elmanyayê tên ragirtin, hatin hilgirtin. Di çalakiyê de belavokên li ser polîtîkayên Elmanya yên krîmînalîzekirina Kurdan, hatin belavkirin û ev polîtîka hatin teşhîrkirin.

DOSYA PÊŞKÊŞÎ SEFARETXANEYÊ HAT KIRIN

Hevserokê CDK-F Rustem Ozay û Berpirsyarên Têkiliyên Derve yê CDK-F'ê Mûrat Polat ji aliyê Sekreterê Sefaretxaneya Elman ve hatin pêşwazîkirin. Li ser mijarê dosyayek radestî rayedarên Elman hat kirin. Endamên CDK-F'ê yên li derve jî bi qîrîna dirûşmeyan, polîtîkaya Elmanya ya li dijî Kurdan şermezar kirin.