Li dijî hewldanên tesfiyeyê yên ji ser “rakirina destlênedayinan” ku li ser HDP’ê tê meşandin, çalakiyên “Dest nede îradeya min” a HDK û KCD’ê didomin.

Li Amedê li dijî hewldanên rakirina destnedayînên parlamenterên HDP'ê ji aliyê AKP'ê ve bertek hate nîşandan. Di çarçoveya çalakiya "Dest nede îradeya min" de bi banga HDP û DBP'ê bi beşdariya sedan welatiyan daxuyanî hate dayîn û peyama "Li dijî derbeya Qesrê em ê xwedî li îradeya xwe derkevin" hate dayîn.

Li dijî hewldanên rakirina destnadîyên parlamenterên HDP'ê li Amedê daxuyanî hate dayîn. Di çarçoveya çalakiyên "Dest nede îradeya min" a ku ji aliyê HDK û KCD'ê ve hate destpêkirin de bi banga rêxistinên HDP û DBP'ê yen Amedê ve li Parka Koşuyolu daxuyanî hate dayîn. Di çalakiya ku bi sedan kes beşdar bûn de dirûşmên "Em ê bi berxwedanê bi ser kevin" "Pêkûtî me bêzar nakin" hatin berzkirin. Wekîla Hevserokên DBP'ê yê Amedê Leyla Ayaz di daxuyaniyê de axivî û anî ziman ku yên ku di 7'ê Hezîranê de îradeya gelan nas nekirin û pêvajoya rakirina destnedayînên parlamenteran bi lez kirin û nîşan dan ku dê îradeya 1'ê Mijdarê nas nekir.

Ayaz diyar kir ku ew ê li dijî darbeya Qesrê têkoşîna demokrasiyê xurtir bikin û xwedî li îradeya xwe derkevin, li dijî teslîm girtina civakê nebin temaşevan. Ayaz ev tişt anî ziman: "Em ê desturê nedin desnedayînên parlamenterên me bên rakirin. Bi pêkanînên nedemokratîk ve em qebûl nakin ku rêxistinên Kurdan, civaka sivîl a Kurd bêne çewisandin. Em ê heta dawî bibêjin ku li dijî derbeya Qesrê bijî têkoşîna me ya demokrasiyê."

Ayaz got ku bi rakirina destnedayînên parlamenterên HDP'ê ve hêviyên ji bo lêgerîna maf a bi riyên demokratîk wê ji holê bên rakirin.

Parlamentera HDP'ê Sîbel Yîgîtalp jî di daxuyaniyê de axivî û got ku gelê Kurd li dijî qatlîaman li ber xwe daye, îradeya xwe nîşan daye ew ê ji bo xwedîlêderketina îradeya 6 milyon kesan heta dawî li ber xwe bidin.

Daxuyanî bi çepik û dirûşma "Em ê bi berxwedanê bi ser kevin" bi dawî bû.