Parlamentera Mêrdînê ya HDP’ê Gulser Yildirim ku di operasyonên qirkirina siyasî de hatibû girtin, bi rêka hevjînê xwe Kamûran Yildirim ji Girtîgeha F-1 a Kandirayê peyam şand û diyar kir ku wê li dijî darbeya Qesrê li ber xwe bidin.

‘EM Ê SERÎ LI BER DARBEYÊ NETEWÎNIN’

Yildirim bal kişand ku ti hincetên hiqûqî yên girtinan nîn in û wiha dewam kir; “Ev operasyonên qirkirina siyasî bi temamî tasfiyekirina demokrasî, meclîs û siyaseta li Tirkiyeyê ye.” Yildirim diyar kir ku rejîma Qesrê darbeyê dide domandin, der bir ku wê bi her şêweyî li dijî darbeyê rabin û wê bi girtinan, qetilkirinan, êşkencekirinê dest ji têkoşîna xwe bernedin.

Yildirim bi bîr xist ku dema wek parlamenter destpêkê hatibû hilbijartin jî di girtîgehê de bû, ev bi lêv kirin; “Hewl dan bi operasyonên KCK’ê me bitepisînin, nebû, nikarin. Ew roj çawa em bi serbilîndî rawestiyan, îro jî em ê wisa bikin.”

JI BO GELÊ MÊRDÎNÊ BANG: XWEDÎ LI ÎRADEYA XWE DERKEVIN

Yildirim xwest ku her kes li her qadê têkoşîna xwe hê mezintir bike û ji bo gelê Mêrdînê bangek taybet kir. Yildirim ji bo gelê Mêrdînê ev peyam şand; “Gelê Mêrdînê egît û fedakar e, ti carî li ber zilmê û mêtingeriyê serî netewandiye. Wê îro jî gelê Mêrdînê serî li ber zilmê netewîne. Ez ê li vir heta dawiyê û bi serbilindî îradeya gelê Mêrdînê temsîl bikim, pêwîst e gelê Mêrdînê jî li her qadê li ber xwe bide û xwedî li îradeya xwe derkeve.”