Hêzên dewleta Tirk duh bi şev bi gelek maşînên zirxî yên bi tîpa Kobra û Kîrpî û kepçeyên zirxî, li hemberî Taxa Gungor a navçeya Colemêrg Geverê operasyonek pêk anîn. Hêzên dewleta Tirk ên ku bi maşînên zirxî dor li Kolana 23'ê Nîsanê girtin, gule li bendan û kolanan reşandin. Hêzên xweparastinê jî di cih de bersiv dan û li ser vê yekê şerekî dijwar qewimî.

Nîvê şevê saet di 02:00 de li heman kolanê, di dema derbasbûna maşîneke zirxî ya bi tîpa Kobra de teqîneke dijwar rû da. Di encama teqînê de maşîna zirxî parça parçe bû û parçeyên wê li derdorê belav bûn. Gelek cebilxaneya ji nava maşînê derket, ket destê hêzên xweparastinê. Parçeyên mezin ên maşînê li dîwarên avahiyan çikiyan.

Hêzen dewleta Tirk piştî teqînê bi 5 maşînên zirxî yên bi tîpa Kîrpî hêzên xwe sewqî herêmê kirin û parçeyên maşîna zirxî ya hat rûxandin, bi dû xwe ve kaş kirin û ji taxê derxistin. Şahidên bûyerê diyar kirin ku tîmên taybet ji hev re gotine, "Şehîdên me hene, bilezînin". Hat ragihandin ku 6 ji birîndaran jî rakirine Nexweşxaneya Dewletê ya Geverê.

Hêzên dewleta Tirk gule li malên li derdorê reşandin û li ser bersiva hêzên xweparastinê, bi maşînên zirxî saet di 05:00 de ji taxê vekişiyan.