Ji bo Festîvala Çanda Kurd a Navneteweyî ya 30'emîn ku 17'ê Îlona 2022'an li bajarê Landgraafê yê Hollandayê tê lidarxistin, sazî û rêxistinên Êzidiyan ên li Ewropayê daxuyaniyeke hevpar dan û banga tevlîbûnê kirin.

Di daxuyaniyê de hate ragihandin ku di nava 30 salan de festîval her mezin bû û bi xwe re diyaloga nava civak, sazî û partiyên Kurdistanî jî xurtir kir.

Di dewama daxuyaniyê de işaret bi bandora dîasporayê li ser dûrketina li çand û hunerê hate kirin û hate gotin, "Bi taybetî ji her kesî zêdetir divê civaka me ya Êzidî xwedî li çand û hunera xwe derkeve."

Daxuyaniyê wiha dewam kir, "Ji bo ku nifşê me yê ji cihê bav û kalan dûr, li dîasporayê winda nebe û têkiliyên wan bi axa pîroz Şengal re pêk were, divê di serî de ji çand, huner, ol û exlaqê civaka xwe dûr nekeve. Xurtkirina çand û hunera Kurdî wê bibe pirek zexm di navbera civaka me ya dîasporayê û Êzidîxanê.

Çawa Kurdistan bê Êzidî nabe, wisa jî Êzidîtayî bêyî Kurdistan nikane xwe biparêze. Bi vê bîr û baweriyê, dubare Banga me li tevahiya Kurdîstaniyan, dost û hevaan û bi taybetî jî li Civaka Êzidî, ku roja 17.09.2022 bi cil û bergên xwe bi ciwanên xwe tevlî vê festîvalê bibe, tevlîbûna vê festîvalê xwedîderketina nirx û ola Êzidîtayê ye, tevlîbûna vê Festivalê şopdariya rêya Mamên Êzdîxan, Mam Zekî Şengalî û Mam Beşîr e."

SAZIYÊN KU BANG KIRIN

Saziyên Êzidiyan ên bang kirin wiha ne:

Navenda Yekîtiya Komeleyên Êzidiyan (NAV-YÊK), Meclisên Jinên Êzidî (SMJÊ), Partiya Azadî û Demokrasiyê ya Êzidiyan (PADÊ), Meclîsa Şengalê ya li Derveyî Welat (MŞD), Hevbendiya Êzidiyên Sûriyeyê (HÊS), Hevgirtina Ciwanên Êzidî (HCÊ), Navenda Çanda Êzidxanê (NÇÊ)