Li Swîsreyê ji bo PKK ji lîsteya ‘rêxistinên terorê’ bê derxistin di 3'ê Çile de kampanyaya îmzeyan hatibû destpêkirin.

Civaka Demokratîk a Kurd li Swîsreyê (CDK-S) û Meclîsên Jinan û rêxistinên Ciwanên Kurd Tevgera Ciwanên Şoreşger (TCŞ) û Teko-JIN heta niha li dehan bajaran îmze kom kirine.

Yek ji bajarên ku kampanya lê dewam dike St. Gallen e ku armanc kir 10,000 îmzeyan berhev bike. 

Hevserokê CDK-S'ê Kenan Can diyar kir ku ew ji sedî 50'ê gihiştine hedefa ku dane pêşiya xwe.

Kenan Can got, "Berî her tiştî me belavok belav kir û bi diyalogên yek bi yek rastiya PKK’ê ku tevgereke gel e ji gelê Swîsre re me vegot.” 

Can bal kişand ser hesasiyeta ku raya giştî ya Swîsreyê li hemberî kampanyayê nîşan dide û got, "Carnan tenê dihatin standê û dixwestin bi xwe îmzeyê bide."

Can anî ziman, ku tevî hewaya baran a roja Şemiyê di nava 3 saetan de zêdetirî 400 îmze kom kirine û wiha dawî li axaftina xwe anî: "Ji bo ku em bigihêjin armanca ku me hedef kiriye, em ê di rojên pêş de lez bidin kampanyayê. Dîsa di vê çarçoveyê de dema ku standan vedikin, em ê bi serdanên malbatan re xebatên xwe yên ji bo bidawîkirina kampanyayê bidomînin."