Biryara Dadgeha Herêma Larnaca ya Qibrisê ku dixwaze siyasetmedarê Kurd Kenan Ayaz radestî Elmanyayê bike, li Lefkoşayê li qada azadiyê ya Lîdra bi mîtîngekê hate şermezarkirin.

Girseya gel bi banga Komîsyona Piştevaniya bi Gelê Kurd re li hev kom bû û pankarta bi nivîsa "Azadî ji Kenan Ayaz re" her wiha wêneyê Teofîlos Georgîadîs hatin hildan ku Georgîadîs ji aliyê dewleta Tirk ve hate qetilkirin.

Li gel Kurdistaniyan her wiha Serokê Giştî yê Partiya Keskan George Perdîkîs, Berdevkê Komîsyona Piştevaniya bi Gelê Kurd re ya Qibrisê Phoebûs G. Sparos, nûnera Partiya Edekê Elena Lympoûrî, ji partiya AKEL'ê Wezîrê Karên Hundir ê berê yê Qibrisê Neoklîs Svlîkîotîs, rojnamevan Alekos Mîchaîlîdîs, Parlamenter Kostîs Elstatîon, Parlamenter Demetrîs Papadakîs, parêzerê Ayaz Efstatîhîoû Elstatîon, nûnerên rêxistinên civakî yên sivîl, rêxistinên ciwanan û komên anarşîst tevlî çalakiyê bûn.

Beşdaran gotin, "Nabe ku têkoşîna siyasetmedar Ayaz weke terorîzmê bê pênasekirin. Em qebûl nakin ku siyasetmedarekî Kurd ê ku jiyana xwe daye azadiya gelê xwe bi destê xwe teslîm bikin. Gelê Qibrisê bi siyasetmedarê Kurd Kenan Ayaz re ye. Têkoşîna Ayaz têkoşîna me ye."

Mîtîng bi dirûşma "Azadî ji Kenan Ayaz re" û bi çepikan bi dawî bû.