Li Mala Gel a li Êrîvanê ya paytexta Ermenistanê gel li hev civiya û 15’ê Tebaxê Cejna Vejînê pîroz kir. Civîn ji bo bîranîna şehîdan bi deqeyek rêzgirtinê dest pê kir. Parlementer Kînyas Hasanov, Hevserokê Komîteya Kurdistanê Silo Dirboyan, endamên Yekîtiya Jinên Azad Jenya Qadir û Seyrana Celad di civînê de yek bi yek axivîn.

Di axaftinan de hat diyarkirin ku Pêngava 15’ê Tebaxê ji bo gelê Kurd ê ku xwe nas nedikir, vejînek e; roja hişyarbûnê ye û wiha hate gotin: “Pêngava 15’ê Tebaxê, îro bûye bingeha avakirina gerîla yên ku li hemberî dijmin bi lehengî şer dikin. Pêngavek a wisa ji bo gelê Kurd û gelên herêmê bûye hêviya azadiyê. Eger ku îro gelê Kurd, gelên herêmê û cîhanê bi felsefeya Rêbertiyê li dijî sîstema kapîtalîst û faşîzmê di nava têkoşînê de ne, 15’ê Tebaxê bûye bingeha vê yekê.”

Di axaftinan de hat destnîşankirin ku divê di vê pêvajoyê de her kes xwedî li destkeftiyan derbikevin û axaftin wiha bi dawî bûn: “Divê em têkoşîna xwe bigihînin astek a bilindtir, azadiya fizîkî ya Rêbertiya xwe û azadiya gelê xwe pêk bînin. Divê hemû lêhêrbûnên me li ser bingeha vê berpirsyariya ku dîrokê daye ser pişta me bin.’’