Ji Fermandarên Navenda Parastina Gel Amed Malazgîrt ji bo hunermend Kadîr Înanir peyameke sersaxiyê weşand.

Malazgîrt anî ziman ku ew gelekî li ber wefata Kadîr Înanir ketin û Înanir bi gotina, "Mirovê bedew, ciwanê leheng ê Derya Reş û dostê dilsoz ê gelê Kurd" bi bîr anî.

Peyama Amed Malazgîrt bi vî rengî dewam kir:

"Hevrê Kadîr li gel hunermendiya xwe ya mezin, rûyê ronî yê Tirkikyeyê û demokratekî bi biryar bû ku timî li gel bindestan bû. Weke aktorekî di sînemayê de bi karakterên şoreşgerî yên li ber zilmê radibû û bi gel re bû, dilîst. Ev yek ne tenê serketineke lîstikvaniyê bû, di heman demê de nîşaneya cewher û karakterê wî yê rasteqîn bû. Bi vê sekn û heqîqeta xwe ya şoreşgerî reh berda nava dilê me hemûyan; ji bo me bû cihê hezkirin û hurmeteke kûr.

Bi hebûna xwe ji me re bû hêz û moral, silava xwe ti carî kêm nekir û bi koça xwe ya dawî re dilê me şewitand. Vî çinarê mezin bi hurmet û hesreteke mezin bi bîr tînim.

Di serî de ji malbata wî, ji hemû hezkirî û dostên wî, ji gelê me re sersaxiyê dixwazim."