Malbata Seven a li bajarê Mulhoûse ya herêma Alsance ya Fransayê dijîn, ji bo azadiya Rêberê Gelê Kurd Abdullah Ocalan li bajarê Strasboûrgê standa îmzeyan vekir. Malbata Seven beriya niha li bajarê Lorîent û derdora wê û li bajarê Mulhoûse 14 hezar îmze berhev kiribû û bang Kurdên li Ewropayê kir ku destekê bidin kampanyayê.

Malbata Seven ku beriya niha li bajarê Lorîent dijiya û berî du mehan bar kir Mulhoûse, Kampanya ji Ocalan re Azadî dewam dike. Ferdên malbatê duh hatin Strasboûrgê û bi standa danîn re dest bi komkirina îmzeyan kirin. Hevser Dervîş û Gulîstan Seven li Qada Kleber ya li navenda bajêr dezgeh danîn û li gel keça xwe Zelîn re di nava 3 saetan de bi sedan îmze berhev kirin. Hin ji Kurdistaniyên li bajêr dijîn jî piştgirî dan malbatê.

“LI MULHOÛSE BI TENÊ ARMANC 5 HEZAR ÎMZE”

Endamên malbatê der barê têkoşîna Ocalan û pirsgirêka Kurd de agahiyan didin û bal kişandin ser girîngiya Kampanyayê. Dervîş Seven ji ANF'ê re axivî û diyar kir ku armanca wan li bajarê Mulhoûseyê komkirina 5 hezar îmzeyan e û ev 2 meh in wan 900 îmze berhev kirine.

Seven bibîr xist ku standa wan a li bajarê Mulhoûse beriya du hefteyan rastî êrîşa komeke faşîstan hatiye û bang li Kurdistaniyên li herêmê kir ku destekê bidin wan. Seven ragihand ku di çarçoveya derfetên xwe de ewê dixwazin li Strasboûrg û bajarên din kampanyayê bimeşînin û bal kişand ser girîngiya beşdariya li vê kampanyaya stratejîk.

DAYIK SEVEN: DIVÊ BERIYA HER KESÎ CIWAN BEŞDAR BIBIN

Gulîstan Seven jî da xuyakirin ku gelekî kêfxweş e ku ji bo azadiya Ocalan û girtiyên siyasî yên Kurd çalakiyê lidar dixe û ji ciwanan xwest beşdarî kampanyayê bibin. Dayik Seven destnîşan kir ku her îmzeya tê komkirin ji bo azadiya Ocalan û azadiya Kurdan, gaveke girîng e.

Malbat Seven ku beriya niha li bajarê Lorîent ê Herêma Bretonya ya Fransayê dijiya, li navendên bajarên Nantes, Vannes, Lorîent, St. Brîeûc Saînt Nazaîre û Rennesê bi rêya standên vekirin, nêzî 13 hezar îmze berhev kiribûn. Ji bo malbata Seven, ji ber komkirina îmzeyan Meclîsa Gelê Kurd a Rennesê di Mijdara sala 2012'an de plaketek dabû wan.

Kampanya ji Ocalan re azadî, di serî de li welatên Ewropa, Emerîka Latîn, Hîndîstan û Başûrê Kurdistanê li gelemperiya cîhanê tê meşandin û heta niha bi mîlyonan îmze hatine berhevkirin. Di çarçoveya kampanyayê de li ber avahiya Konseya Ewropayê ya li bajarê Fransa Strasboûrgê, ji 25'ê Hezîrana 2012'an û vir ve bê navber çalakiya nobedê tê meşandin.