Li navçeya Colemêrg Geverê di encama serdegirtinên malan de gelek ciwan hatin binçavkirin.

Li navçeya Colemêrg Geverê, di encama serdegirtina malên li taxên Yeşîldere, Gungur, Kişla û gundê Xurekana Serî de gelek ciwan hatin binçavkirin. Tîmên taybet ên polîsên Tirk nîvê şevê avêtin ser 25 malan û Nadîfe Oren, Ozgur Dayan, Evliya Şedal, Recep Terzîoglû, Savaş Ozgur, Savaş Kemalî, Yaşar Kirdar, Îlyas Yurek, Fatîh Kûtlûk, Zafer Kûtlûk, Şîrvan Kûtlûk, Kevkes Kilicak, Cîhat Harmanci, Mazlûm Harmanci û Umît Macît kirin bin çavan.

Hat ragihandin ku di serdegirtinan de pace û deriyên malan hatine şikandin, polîsan bi pêlavên xwe yên herî û qirêj ketine nava malan, zexta psîkolojîk li xelkê li malan kirine.

Hat hînbûn ku serdegirtinên malan bi fermana dozgeriya Wanê ve hatiye kirin û yên hatine binçavkirin birine Muduriyeta Emniyetê ya Colemêrgê. Hat ragihandin lêgerîna li hin malên li navçeyê dewam dike, ketin û derketina ji navçeyê ji aliyê tîmên taybet ve tê kontrolkirin.