Ciwanên Azad kongreya xwe ya damezrandinê ya Ewropayê, sibê li paytexta Fransa Parîsê lidar dixe.

Ciwanên Azad hewl dide ji pirsgirêkên civakî, siyasî û çandî yên nifşê sêyemîn ê Ciwanên Kurd li Ewropayê re bibe bersiv. Kongre dê sibê saet di 10:00 de li Salona Nelson Mandela ya li Banliyoya Sarcelles a Parîsê destpê bike. Endama Komîteya Amadekar a Kongreyê Besta Amed agahî da û destnîşan kir ku ciwanên Kurd wê bi awayekî hîn rêxistinbûyî dest bi 3'ê Mijdarê bikin.

Amed ragihand ku ew li bendê ne ji gelemperiya Ewropayê 200 delege û 800 mêvan beşdarî kongreyê bibin û got, "Emê di kongreyê de rêzikname, amblem, rêveberî û polîtîkaya xwe diyar bikin."

Amed diyar kir ku bi kongreya damezrandinê re dê hemû rêxistinbûyîn, sazî û komeleyên ciwanên Kurd li Ewropayê di bin sîwana Federasyona Ciwanan de veguherin saziyekê. Amed got, "Ciwanên Kurd ên li Ewropayê wê bi rêxistinbûyîneke xurttir û gaveke din nêzî azadiyê dest bi 3'ê Mijdarê bikin. Xebatên bi sedan ciwanên Kurd ên li Ewropa û Fransayê bi ruhê seferberiyê dimeşînin, temam bûne."