Çalakî ji aliyê 9 saziyên medya û rêxistinên civakî yên sivîl ve hat lidarxistin, ku di nav de Rêxistina Efûyê ya Navneteweyî, Rojnamevanên Sînornenas, Yekîtiya Nivîskarên Swêdê, Kulûba PEN a Swêdê, Federasyona Rojnamevanan, Yekîtiya Weşangeran û rojnameya Exprerssen jî hene.

Rêxistinên xwepêşandan organîze kirin, ji bo balê bikişînin ser şert û mercên jiyanê yên Îsaak, hucreyek ji text a bi qasî hucreya Îsaak lê dijîn çêkirin û li Gara Navendî ya Stockholmê bi cih kirin. Ji mirovên li vê derê hat xwestin, bikevin nava vê hucreya tarî û 15 deqeyan tê de bimînin.

Îsaak, ji ber ku gotarek ji rojnameyek li Erître re nivîsand û polîtîkaya hikûmetê rexne kir, di 23'ê Îlona 2001'an de hat girtin. Tevî ku 15 sal di ser re derbas bûne, hê doz lê nehatiye vekirin û ew dernexistine pêşberî dadgeriyê. Destûr nayê dayîn ku malbata xwe û parêzerên xwe bibîne.

Heta vê dawiyê nedihat zanîn bê Îsaak sax e yan na. Di Hezîrana îsal de, Wezîrê Karên Derve yê Erîtreyê Osman Saleh ji Radyoya Fransayê RFI re axivî û diyar kir, ku Îsaak dijî û wê hikûmet biryarê bide bê kengî derkeve pêşberî dadgehê.

Ji koordînatorên çalakiyê Brît Stakston der barê çalakiyê de ji ajansa me re axivî û anî ziman, ku bala gel gelekî li ser çalakiya wan bû. Stakston da xuyakirin, ku di nava 6 saetên çalakiyê de 14 kes bi 15 deqeyan di hucreyê de man û destek dan Îsaak.

Serokê saziya Rojnamevanên Sînornenas Jonathan Lûnqvîst jî got, girtina Dawit Îsaak a 15 salan li girtîgehê, ji bo hikûmeta Swêdê neserketineke mezin e û destnîşan kir, ku divê Swêd êdî rastiya rejîma Erîtreyê bibîne.

WÊ XWEPÊŞANDAN BÊN LIDARXISTIN

Roja 23'ê Îlonê saet di 10:00 de wê li ber Sefaretxaneya Bilind a Erîtreyê ya li Stockholmê, piştî nîvro jî li Stasyona Trenê ya Navendî xwepêşandan bên lidarxistin û hikûmeta Erîtreyê were şermezarkirin. Li Fûara Pirtûkan a Goteborgê ku îro destpê kir, ji bo balê bikişînin ser binpêkirina maf û azadiyan ên li Erître, wê panel û semîner bên lidarxistin.