Ji karesata penaberan a 3'ê Cotmeha 2013'an û vir ve, ku li Girava Lampedûsa qewimî, herî kêm 11 hezar 400 penaber li Derya Spî jiyana xwe ji dest dan. Pêla koçberiyê ji ber xeteriyên mezin jî, dewam dike.
Li gorî agahiyan, di operasyonên duh tenê de zêdeyî 5 hezar 600 penaber hatin rizgarkirin.
Yekîneyên ewlekariya peravên Îtalyayê dan xuyakirin, ku ji penaberên li peravên Lîbyayê bi 39 kelek û botan bi rê ketin, yekî jiyana xwe ji dest daye. Rayedaran gotin, li van kelek û botan bi qasî 5 hezar 600 penaber hatine rizgarkirin.
Saziyên alîkariyê yên mîna Rêxistina Doktorên Sînornenas (MSF), Save the Chîldren, SOS Medîterrannee (Derya Spî), Proactîva Open Arms û Sea-Eye jî destek dan operasyonên rizgarkirinê.
Di 3'ê Cotmeha 2013'an de li nêzî Girava Lampedûsa ya Îtalyayê keştiyek noqî binê avê bûbû û bi sedan penaber li Derya Spî xeniqî bûn. Di vê karesata mezin de 366 cenazeyên penaberan ji nava avê hatibûn derxistin.
Li gorî Neteweyên Yekbûyî, di nava 3 salên di ser vê bûyera li Lampedûsa re derbas bûn, herî kêm 11 hezar 400 penaberên din li Derya Spî jiyana xwe ji dest dan.
