Berdevkê UNICEF’ê Ricardo Pires li Cenevreyê daxuyanî da û diyar kir ku di hefteya dawî de her rojê derdora 11 zarokan hatin kuştin yan jî birîndar bûn.

Pires anî ziman ku beşekî mezin ê zarokan di êrîşên li ser Başûrê Lubnanê de hatin hedefgirtin. Hat ragihandin ku tenê di nava rojekî de 7 zarokan jiyana xwe ji dest dan û 30 zarok birîndar bûn.

BINPÊKIRINÊN AGIRBESTÊ

Li gorî daneyên UNICEF’ê ji agirbesta 17’ê Nîsanê ve ku tê binpêkirin, li Lubnanê 55 zarokan jiyana xwe ji dest dan û 212 zarok jî birîndar bûn.

Li gorî Wezareta Tenduristiyê ya Lubnanê, Îsraîlê roja pêncşemê êrîş bir ser başûrê welêt û di encamê de herî kêm 14 kesan jiyana xwe ji dest dan. Di êrîşeke din a li nêzî Beyrûtê de jî, 3 kes mirin ku 2 ji wan zarok bûn.

JI UNICEF’Ê BANGA HIQÛQA NAVNETEWEYÎ

UNICEF’ê bang li hemû aliyan kir ku li gorî agirbestê û hiqûqa navneteweyî tevbigerin. Di daxuyaniyê de hate diyarkirin ku divê zarok û binesaziyên sivîl di her şert û mercî de bên parastin û saziyên alîkariyê yên mirovî bi bikarin bi rengekî bi ewle û bêastengî xwe bigihînin herêmên Başûrê Lubnanê.

Li gorî daneyên fermî, ji meha adarê û vir ve ji ber şerê dewam dike, di encama êrîşên Îsraîlê de li Lubnanê herî kêm 3 hezar û 324 kesan jiyana xwe ji dest dan.