Bi dehezaran şêniyên kantona Firatê 47’emîn damezrandina Partiya Karkerên Kurdistanê (PKK) Cejna Berxwedana Neteweyî li Stadyuma Şehîd Bawer Agir a bajarê Kobanê pîroz kir.

Di şahiyê de wêneyên Rêber Apo, alên PKK, QSD û wêneyên şehîdan hatin hildan û dirûşmên "Bijî berxwedana gerîla", "Bê Serok jiyan nabe" û "Jin Jiyan Azadî" hatin berzkirin.

Şahî bi deqeyek rêzgirtin dest pê kir. Dûre berdevka Kongra Star a Kantona Firatê Xunav Xelîl Cejna Berxwedana Neteweyî li hemû gelê azadîxwaz, cangoriyên azadiyê û li Rêber Apo pîroz kir.

Xunav diyar kir ku damezrandina PKK’ê ji bo gelên bindest, bi taybetî gelê Kurd vejînek bû û wiha got: "PKK`ê hebûn û nasnameya gelên bindest parastin. Mirovahiyê bi saya PKK`ê xwe nas kir. Em jî bi saya PKK`ê li vir in û em vê roja vejînê pîroz dikin."

Hevserokê Desteya Gazî û Malbatên Şehîdan a Kantona Firatê Mistefa Êto destnîşan kir ku PKK`ê gelên di tarîtiyê de bûn, ber bi ronahiyê ve bir û wiha pê de çû: "PKK`ê hebûn û hêza me ye. Yê ku PKK`ê ava kir Rêber Apo ye. Rêber Apo bi fikir û felsefeya xwe hemû kesên bindest azad kir. Lê 27 sal e Rêber Apo di zindana Îmraliyê de ye. Çawa ku Rêber Apo em azad kir û hişt ku em palanên dijmin têk bibin, divê em bi hemû hêza xwe têkoşîn û berxwedana xwe xurtir bikin û azadiya fîzîkî ya Rêber Apo misoger bikin. Em vê cejna Berxwedana Neteweyî li Rêber Apo, gerîlayên azadiyê, şehîdan û mirovahiyê pîroz dikin."

Piştî axaftinan komên stranan ên girêdayî Navenda Çand û Hunera Baqî Xido û Hîlala Zêrîn û hunermendên ji pêkhateyên Ereb, her wiha û Şerîfo Omerî bi stranên xwe gel çoşand. Li ber stranan dîlan hatin gerandin.

Bi heman boneyê, di saetên nîvro de pirtûkxaneya bi navê Şehîd Koçero Batman (Hasan Demîrtaş) 6`ê Cotmeha 2022`an di encama êrîşeke hewayî ya dewleta Tirk de şehîd bûbû, hat vekirin. Di pirtûkxaneyê de nêzî 5 hezar pirtûk hene.