Meclîsa Sûriyeya Demokratîk (MSD), bi hevkariya Partiya Paşerojê ya Sûriyeyê, li hola civînan a bajarokê Um Hicêra, yê girêdayî bajarê Holê li kantona Cizîrê, civînek ji gel re lidar xist.

Şêniyên herêmê, serok û nûnerên eşîran û endamên saziyên Rêveberiya Xweser beşdarî civînê bûn.

Civîn bi deqeyek rêzgirtinê dest pê kir, piştre hevserokê Ofîsa Têkiliyên a MSD`ê Hisên Ezam li ser mijara gotara nefretê, ku bi taybetî li deverên di bin kontrola Hikûmeta Veguhêz a Sûriyeyê de belav dibe, axivî.

Ezam diyar kir ku rewşa Sûriyeyê hewceyî bi yekîtî û piştgiriya hemû pêkhateyên civakê heye. Her wiha xwest ku pêkhateyên civakê li dora Rêveberiya Xweser û Hêzên Sûriyeya Demokratîk (QSD) kom bibin.

Hevserokê MSD`ê Mehmûd El Mislit, li ser herêmên Bakur û Rojhilatê Sûriyeyê axivî û got ku ev herêm dikarin peyamên erênî ji cîhanê re bişînin, tevî dijwarî û krîzên girîng ên ku di salên dawî de pê re rû bi rû mane.

El Mislit diyar kir ku berpirsiyarî dikeve ser milê her kesî, serokên eşîran, ciwan, jin û siyasetmedaran ku pêşî li nakokiyên navxweyî an mezhebî bigirin, ji ber ev nakokî dikarin bibin sedema wêrankirina herêmê.

Di dawiya civînê de, beşdaran nêrîn û pirsên xwe yên di derbarê rewşa siyasî de parve kirin, her wiha hin daxwazên têkildarî xizmetê anîn ziman.