Êrişên li ser Bakur û Rojhilatê Sûriyeyê giran dibin. Li xeta Tişrînê di navbera hêzên QSD-YPJ û çeteyên Şam û Enqereyê de şerekî giran diqewime. Çete hewl didin bi tankan bi pêş ve biçin, şervanên QSD û YPJ'ê bersiva tund didin.
Çeteyên dewleta Tirk û Şamê ku êrişên dagirkeriyê yên li ser Bakur û Rojhilatê Sûriyeyê berfireh kirine, bi giranî êrişî dibin ser Tişrînê ku li başûrê bajarê Kobanê yê Kantona Firatê ye.
Li Tişrînê ku bi tank, top û çekên giran tê bombekirin, liv û tevgera droneyên bombebarkirî yên çeteyên dewleta Tirk û Şamê dewam dike.
Li gorî agahiyan, li Girê Suryatel ê li herêmê di navbera şervanên QSD-YPJ'ê û çeteyan de şerekî giran diqewime.
Çeteyên Şamê û Enqereyê hewl didin li Girê Suryantelê bi tankan bi pêş ve biçin. Şervanên QSD û YPJ'ê bi tundî bersivê didin hewldanê.
