Rûniştina destpêkê ya li ser darizandina Mehmet Altûn û ferdên malbatê Çalik û Keleş ên ku 30'ê Tîrmehê li navçeya Meramê ya Konyayê malbata Dedeogûllari qetil kir, li 4'emîn Dadgeha Cezayê Giran a Konyayê dest pê kir.

Di dozê de tenê bersûc Mehmet Altûn girtî ye, Mehmet Altûng bi rêya Sîstema Deng û Dîmen a Ragihandinê (SEGBÎS) ji girtîgehê tevlî rûniştinê bû. Ji 10 bersûcên negirtî 5 jê tevlî rûniştinê bûn.

Parlamenterên Partiya Demokratîk a Gelan (HDP) Zuleyha Gulum, Oya Ersoy, Mahmût Togrûl, Abdullah Koç, parlamenterên Partiya Gel a Komarê (CHP) Sezgîn Tanrikûlû, Levent Gok, parêzerên Komîsyona Mafên Mirovan û Hiqûqê ya HDP'ê, parêzerên Komeleya Hiqûqnasan a ji bo Azadiyê (OHD), nûner û serokên baroyên Enqere, Amed, Wan, Mêrdîn, Şirnex, Riha û Batmanê, parêzerên Komeleya Mafên Mirovan (ÎHD), Komeleya Hiqûqnasên Hemdem (ÇHD), nûnerên Yekîtiya Baroyên Tirkiyeyê (TTB) û gelek kes ji bajar û navçeyê Konyayê tevlî rûniştina dozê bûn. Her wiha gelek rojnamevan jî dozê dişopînin.