Dayikên Şemiyê ji hefteya 700’î vir ve nikarin biçin li Qada Galatasarayê çalakiya xwe ya heftane li dar bixin. Dayikên Şemiyê serî li Dadgeha Destûra Bingehîn (AYM) dan û AYM’ê têkildarî dorpêça polîsan a li Qadê û astengkirina çalakiya Dayikên Şemiyê biryara “binpêkirina maf” da. Tevî vê biryarê jî Dayikên Şemiyê yên îro çûn Qada Galatasarayê û xwest çalakiya xwe li dar bixin. Polîsan carek din Dayikên Şemiyê dorpêç kir û destûr nedan ku dayik çalakiyê bikin. 

Dayikên Şemiyê û parêzvanên mafê mirovan tevî astengiya polîsan jî daxuyanî dan. Polîsan di nîveka daxuyaniyê de êrişî çalakiyê kir. Di vê navberê de dayikan û parêzvanên mafê mirovan biryara AYM’ê bi bîr xist lê tevî vê yekê jî polîsan dayik û çalakvan destgîr kir. 

Li derdora Qada Galatasarayê ya li Cadeya Îstîklalê dorpêça polîsan didome. 

Hevseroka Komeleya Mafên Mirovan (ÎHD) Eren Keskîn, Seroka Şaxa ÎHD'ê ya Stenbolê Gulseren Yolerî û Dayikên Şemiyê jî di nav de herî kêm 15 kes hatin destgîrkirin.

Heta niha ji nav kesên hatine destgîrkirin, navê van kesan hatiye eşkerekirin:  Parêzer Eren Keskîn, parêzer Gulseren Yolerî, Hanîfe Yildiz, Masîde Ocak, Îrfan Bîlgîn, Mîkaîl Kirbayîr, Leman Yurtsever, Ayşe Tepe, Sebla Arcan, Îkbal Eren, Besna Tosun.