Nobeta Edaletê ya malbatên girtiyên nexweş û girtiyên ku înfaza wan hat şewitandin a li Îzmîrê di roja 71'an de berdewam dike. Di Nobeta Edaletê de hate diyar kirin ku bi meşa ber bi Gemlîkê ve li dar bixin dê tecrîdê bişikînin.
Nobeta Edaletê ya malbatên girtiyên nexweş û girtiyên ku înfaza wan hat şewitandin a li Îzmîrê di roja 71'an de li Girtîgeha Kiriklari ya Bûca ya Îzmîrê berdewam kir. Rêveberên HDP'ê yên navçeyên Konak û Torbaliyê serdana malbatên ku li ber derê girtîgehê hatin gelhev kirin. Malbatan, berdilkên li ser wan nivîsa "Ji girtiyên nexweş re azadî" nivîsandî li xwe kirin û timî dirûşmeyên "Girtiyên siyasî rûmeta me ne" , "Bijî berxwedana zindana" û "Maf, hiqûq û edalet" berz kirin.
‘EM Ê TECRÎDÊ BIŞIKÎNIN‘
Hevserokê HDP'a Konakê Abdulvahap Bal, li vir axivî û diyar kir ku tecrîda li ser Rêberê Gelê Kurd Abdullah Ocalan belavî tevahiya civakê bûye û got: "Girtiyan tedawî nakin û wan bernadin. Demeke dirêj e dayik li vir Nobeta Edaletê digirin. Daxwazên dayikan hiqûqî ne û em jî li pişt wan in. Em ê jî li dijî nzextên li girtîgehan û tecrîda sûcê mirovahiyê bimeşin Gemlîkê. Em ê vê tecrîdê bişikînin."
‘BILA PÊKANÎNÊN NEHIQÛQÎ DEMILDEST BÊN BIDAWÎKIRIN‘
Hevseroka HDP'a Konakê Azîze Çelebî jî diyar kir ku li girtîgehan zext û binpêkirinên mafan pêk tên. Ev pêkanîn ne hiqûqî ne. Daxwazên malbatan meşrû ne. Bila pêkanînên nehiqûqî demildest bên bidawîkirin."
Çalakî bi dirûşmeyên "Girtiyên siyasî rûmeta me ne" û "Bijî berxwedana zindana" bi dawî bû.
