Di çalakiya "rûniştina F" ya vê hefteyê de rojev pêkanînên tecrîdê ya li Girtîgeha Sîlîvriyê bû. Parêzerê Nasrullah Kuran û Çetîn Arkaş ên ji Îmraliyê sirgûnî Sîlîvriyê hatin kirin, Rezan Sarica destnîşan kir ku tecrîda li Îmraliyê li Girtîgeha Sîlîvriyê berdewam dike. 

Komîsyona Girtîgehê ya Şaxa Komeleya Mafên Mirovan a (ÎHD) Stenbolê, ji bo balê bikşîne ser rewşa girtiyên nexweş 201'emîn çalakiya "rûniştina F" li Qada Galatasarayê kir. Di çalakiyê de pankartên li dijî tecrîdê hatin vekirin û parazvanên mafên mirovan wêneyên girtiyên nexweş hilgirtin. 

Di çalakiya vê heftê de bal hat kişandin ser rewşa Girtîgeha Hejmar 9 a Sîlîvriyê. Di çalakiyê de parêzerê Nasrullah Kuran û Çetîn Arkaş ên ji Girava Îmraliyê sirgûnî Girtîgeha Sîlîvriyê hatin kirin, Rezan Sarica axivî. Sarici anî ziman ku ew nikarin bi muwekîlên xwe re hevdîtinê bikin û tecrîda li Îmraliyê, li Girtîgeha Sîlîvriyê berdewam dike. 

Piştî Sarica, endamê Komîsyona Girtîgehê ya ÎHD'ê axivî. Dolu destnîşan kir ku li girtîgehên ku girtiyên siyasî lê dimînin, zext û binpêkirinên mafan bilind bûne. Dolu bibîrxist ku çawa ku Kuran û Arkaş anîn girtîgehê, hevdîtina wan a bi malbat û parêzeran hate qedexekirin. 

'LI SÎLÎVRIYÊ 6 GIRTIYÊN NEXWEŞ ÊN GIRAN HENE'

Dolu diyar kir ku li Girtîgeha Sîlîvriyê ne tenê li hemberî Kuran û Arkaş, li hemberî hemû girtiyên PKK'yî polîtîkayên tecrîdê tê meşandin. Dolu di dawiya axaftina xwe de bal kişand ser girtiyên nexweş jî û got: "Li vir li gor lîsteya me 6 girtiyên nexweş ên giran hene. Ji ber ku girtiyên nexweş jî ji mafê hevdîtina bi parêzer û malbatan re bêpar mane, ji ber ku xwe gihandina tenduristiyê tê astengkirin, jiyana wan ketiye xetereyê."