Li Cizîra Botan terora dewletê ya li hemberî berxwedana xwerêveberiyan di roja 12'êmîn de berdewam dike. Ev çend roj in, tankên li girên stratejîk hatibûn bicihkirin taxên Yafes, Nur, Cudî û Sur topbaran dikirin. Îro, taxên Alîbey û Kalê yên li navenda bajêr jî hatin topbarankirin û gelek mal bûn hedefa topan.

Welatiyê bi navê Lokman Şen ê ku top li mala wî ya li Taxa Alîbeyê ket, diyar kir ku dewlet dixwaze bi topbaranê ve her kesî bikuje. Şen da xuyakirin ku dema ew û 6 zarokên xwe li mal bûn, top li mala wan ketiye û got "Piştî ku em ji odeyê derketin top lê ket, an na em hemû niha li morgê bûn."