Rêxistina HDP'ê ya Navçeya Wan Qelqeliyê, komkujiyên li Cizîrê û êrîşên nîjadperest ên li hemberî avahiyên HDP'ê, bi daxuyaniyeke çapemeniyê şermezar kir. Di daxuyaniyê de tevî rêveberên HDP û DBP'ê yên Navçeyê, Hevşaredarên Qelqeliyê gelek kes amade bûn.

Hevserokê HDP'ê yê Qelqeliyê Recep Ceylanci daxuyanî da û diyar kir ku piştî hilbijartinên 7'ê Hezîranê Erdogan û hikûmeta AKP'ê li hemberî Kurdan şer daye destpêkirin û bi vî şerî xeyala serokatiyê dikin. Ceylanci bal kişand ser êrîşên faşîst ên li hemberî HDP'ê û xwest, ev êrîş tavilê bi dawî bibin.

Ceylanci got, "Ji vê derê em bi awayekî zelal û vekirî dibêjin; eger komkujiyên li Cizîrê nesekinin her der wê bibe Cizîra Botan. Em ê nirxên xwe, jiyana xwe, pêşeroja azad û wekhev a gelên xwe, li dijî hêrs û daxwaza desthilatdar û şer a Erdogan, biparêzin."